2023 жылдың 12 сәуірінде « Ғылым күніне» орай «Экономика және сервис» факультетінің «Әлеуметтік-гуманитарлық пәндер» кафедрасы «Тұлға –Ел – Тарих» атты танымдық семинар өткізді.

Семинардың ашылуында мемлекеттік тіл мен тарихтың жастар тәрбиесі үшін маңыздылығы жайында Қазақ ТБУ-нің ғылым және халықаралық қатынастар бойынша проректоры Алтынбек Серік Атақонысұлы сөз сөйледі.

Бұған дейін ұйымдастырылып өткен студенттердің ғылыми-зерттеу жұмыстары сайысының жүлдегерлері мен ғылыми жетекшілерін марапаттау рәсімінде Әлеуметтік-гуманитарлық пәндер кафедрасының меңгерушісі Алтайбекова Қанағат Тұрсынбайқызы ғылыми зерттеумен айналысып жүрген студенттер мен олардың жетекшілері, кафедра оқытушыларына алғыс білдірді.

Танымдық семинардың негізгі бөлігінде тарихшы Дархан Асқарұлы өз баяндамасын студенттер мен оқытушылар назарына ұсынды. Баяндамада қазақтың көне тарихы, адамға есім қою дәстүрі және астрономия, түркілердің ежелгі күнтізбесі (тоғыс есебі), далалық өркениет жетістіктері, сақ қорғандары мен Мысыр пирамидаларының ұқсастығы туралы қызықты мәліметтерді қамтыды. Арал теңізінің апаты туралы деректі фильм көрсетіліп, қатысушылармен талқылау жүргізілді.

Кафедра оқытушылары Думан Мукановна, Алмагүл Калижаровна, Ержан Шаймарданович студенттерге жетекшілік етіп, семинарды ұйымдастыруға атсалысты. Студенттер жеке тарихи тұлғалар туралы өз баяндамаларын ортаға салды: Дюсекова Айдана «Шоқан Уәлиханов –тұңғыш қазақ ғалымы» тақырыбында, Жақашев Иса «Әлкей Марғұлан – әмбебап ғалым» тақырыбында және Ділдаханова Ақнұр «Қаныш Сәтбаев – қазақ ғылымының атасы» тақырыбында.

«Экономика және сервис» факультетінің деканы Нұрғалиева Алмагүл Шаймұратқызы баяндамашы студенттердің еңбегін бағалап факультет атынан жас зерттеушілерді марапаттады.

Студенттер жеке тарихи тұлғалар, ел тарихы, түркі өркениетінің тарихи жетістіктері жайында кең көлемде қызықты ақпараттарға қанықты. Қатысушылар тарихи танымды тереңдетуге, мемлекетшілдік сананы нығайтуға бағытталған мұндай шаралардың білім алушылар үшін аса қажет екендігін атап өтіп, шараны ұйымдастырушыларға өз ризашылықтарын білдірді.